Sparnaðarráð #2

Nú þegar jólahátíðin er á næsta leiti á fólk það svolítið til að spreða meira en það ætlar sér. Ég tala sjálf af reynslu enda oftast sem ég fer í jólagjafaleiðangur og enda með því að gefa sjálfri mér 5 jólagjafir í hverri ferð. Veit ekki hvort fleiri glími við þetta vandamál. Það þarf allavega engann snilling til þess að sjá að þetta gæti auðveldlega komið manni á hausinn. 

Mér fannst því tilvalið að deila með ykkur öðru sparnaðarráði. Ég mæli þó með því að þið farið í hraðbanka og takið út pening áður en þið hrindið sparnaðinum í framkvæmd. 

Þetta sparnaðarráð er jafn auðvelt og það síðasta. Í verkið þarf aðeins 4 hluti. Ég leyfi myndunum að tala sínu máli.

Í verkið þarf plastbox, vatn og greiðslukort að eigin vali, þó ekki eitthvað sem er aldrei í notkun.

Já þetta skýrir sig nokkurn veginn sjálft. Boxinu er svo lokað og því stungið inn í frysti. Þeir sem eiga ekki frysti geta því miður ekki nýtt sér þetta ráð og verða því að leita annarra leiða í sparnaði að þessu sinni.

Eins og þið sjáið er ekki beint auðveld að nálgast kortið í fljótu bragði svo þetta er snilldar ráð fyrir þá sem eiga það til að grípa með sér kortið á leið út. Ekki myndi ég allavega stinga ísmola í vasann á leið út úr húsi, en hver verður að dæma fyrir sig. 

Eini gallinn er sá að kortið sekkur á botninn, betra væri að hafa það í miðjunni. Ef einhver lumar á ráði við þessu þá væri það kærkomið ef viðkomandi væri til í að deila því með restinni af okkur. 

Vonandi nýtist þetta ráð ykkur vel um hátíðarnar og þið eigið gleðileg og sparnaðarsöm jól!