Myndasögur #5

Þessa dagana er hversdagsmyndaleikurinn að tröllríða öllu á facebook. Það hlaut að koma að því að einhver skoraði á mig en þar sem mér finnst þetta orðin fremur þreyttur leikur þá ætla ég að sleppa honum. Í staðin fáið þið nokkrar myndir hér frá síðustu dögum og vikum í mínu lífi. Bæði hversdags og ekki.

Við feðgin skelltum okkur í göngutúr upp að Helgustaðanámu seinnipartinn í dag í blíðunni.

Ég sá ægilega sniðugt myndband á instagram um daginn sem sýndi, að því er virtist, mjög auðvelt trix til að lakka neglurnar á flottan hátt. Þetta var asentonað af nöglunum strax eftir myndatökuna. 

Einfalt mæ ass.

Þetta gerðist um daginn. Nú er betra að fara að vara sig á því hvað fer í history.

Ég skellti mér á Eurovision um daginn. Áfram Ísland!

Skoðanir fólks á sigurlaginu eru jafn misjafnar og þær eru margar. Ég var þó ánægð með sigurinn enda bæði lagið og söngkonan flott. Burtu með fordóma!

Ég gerði alveg svolítið af því að naglalakka mig í maímánuði.

Það er ekki tekið út með sældinni að vinna í álveri yfir sumarmánuðina. Mælirinn sýndi 27 gráður síðustu helgi. Þetta verður sveitt sumar. 

Að lokum er hér mynd af nýlegum kaupum. Augnskuggar og sumarlegur kimonojakki. Ekki skemmdi fyrir að þetta var sá síðasti í búðinni og fékkst því á gjafaprís.

Fyrir áhugasama má finna mig á Instagram undir @kristveiglilja. 

Þar kennir ýmissa grasa en þar má meðal annars finna mikið af naglalakks og eurovision myndum. Fyrir þá sem hafa gaman af svoleiðis fíflaskap er um að gera að ýta á follow.

Kjúklinganúðlur á kínverska vísu

Ég held ég verði seint titlaður einhver meistarakokkur, allavega ekki miðað við tilþrif mín í eldhúsinu. Ég er einnig mjög hugmyndasnauð þegar kemur að því að ákveða hvað skal hafa í matinn svo ég er með svona 5 uppskriftir sem ég skiptist bara á að elda. 

Ein þeirra er uppskrift af eggjanúðlum með kjúkling, dásamlega góður réttur sem hefur aldrei klikkað! Ég ætla að gefa ykkur uppskriftina og vona að ykkur líki vel.

Í uppskriftina þarf eftirfarandi hráefni:

3 kjúklingabringur

1 pakka eggjanúðlur

1 papriku

1 lauk

1 box af sveppum

Ostrusósu

Soyasósu

Púðursykur

Ég er mikill dassari þegar kemur að því að elda svo ekki láta ykkur bregða ef orðunum dass og slurk mun bregða fyrir í færslunni.

Byrjað er á því að henda kjúklingabringunum inn í ofn eða steikja þær á pönnu, það fer allt eftir hentisemi. Best er að krydda þær örlítið með kjúklingakryddi eða salti og pipar. 

Á meðan bringurnar malla eru núðlurnar soðnar eftir leiðbeiningum á pakka og niðurskorið grænmetið steikt á pönnu við vægan hita.

Á þessu stigi málsins reynir á multitaskarann í mönnum. 

Þegar núðlurnar eru soðnar er vatninu hellt af þeim og þeim blandað saman við grænmetið og því næst er niðurskornum kjúklingabringunum bætt við blönduna. 

Þá er komið að dassinu.

Í "sósuna" þarf ostrusósu, soyasósu og púðursykur. Ég hef aldrei notað neinar mælieiningar við sósugerðina í þessari uppskrift og er nánast sannfærð um það að betra sé að dassa hana til svo hún verði fullkominn.

Ég set um það bil hálfa flösku af ostrusósu, jafnvel aðeins meira, góðan slurk af soya sósu, ætli það séu ekki um það bil 1-2 matskeiðar. Því næst er góðum slatta af púðursykri hellt yfir, um það bil hálfum desilítra.

Þessu er svo blandað vel saman og smakkað til. Ekki hika við að setja minna af hráefnunum og bæta svo bara við ef ykkur finnst eitthvað vanta uppá.

Það hljómar kannski ekki vel að blanda saman púðursykri og soyasósu og hella því yfir kjúkling og núðlur en treystið mér, þetta er með því betra sem ég hef smakkað.

Skora á ykkur að prufa þennan rétt, það verður enginn svikinn!

Instagrammari ársins

Í gærkvöldi var mér bent á þennan vægast sagt skemmtilega Instagram aðgang.
Hún kallar sig Baddie Winkle og er alveg eiturhress miðað við aldur og fyrri störf.

Ég mæli allavega með því að allir fylgi henni á Instagram. Ég hef allavega helvíti gaman af henni.

Snyrtiveskið mitt

Stærstan hluta ævi minnar hef ég búið á Reyðarfirði. Fyrir þá sem ekki vita þá er það lítill bær fyrir austan. Þegar ég segi fyrir austan á ég að sjálfsögðu við Austurlandið, ekki Selfoss og nágrenni.

Á austurlandi var ekki mikið snyrtivöruframboð og lengi vel samanstóð því snyrtivörusafn mitt af þeim vörum sem fengust hverju sinni í Lyfju á Reyðarfirði. 

Fyrst um sinn notaði ég einungis vörur frá MaxFactor. Þær hurfu svo um leið og þær vörur voru látnar víkja fyrir Gosh. 

Ég hafði fáar aðrar vörutegundir prófað en þessar tvær svo mig skorti ekki neitt. Ég hélt að eitt merki væri mér heldur betur nóg.

Þar til fyrir hálfu ári síðan innihélt snyrtiveskið mitt að mestu ennþá einungis vörur úr apótekinu. Ekki það að það sé eitthvað slæmt, alls ekki.

Ég var þó orðin töluvert þreytt á því að vera alltaf með sama gamla dótið og ákvað því að prufa eitthvað neitt. Af stað hélt ég því í jómfrúarferð mína í MAC.

Ég hafði sannarlega oft labbað framhjá MAC búðinni en aldrei þorað þar inn. Manneskja sem veit ekki hvað skal gera við highlighter getur nú varla átt erindi þangað. Ég sprangaði því um og reyndi að láta lítið fyrir mér fara í fyrstu og þorði ekki fyrir mitt litla líf að biðja um aðstoð, enda vissi ég varla að hverju ég var að leita.

Ég var í þann mund að fara að labba út tómhent þegar ein afgreiðslustúlkan vatt sér upp að mér og áður en ég vissi af var ég komin í förðun.

Ég náði því í þeirri ferð að næla mér í nokkrar vörur sem ég gæti í dag ekki hugsað mér að vera án.

Mér finnst lang skemmtilegast að blanda saman allskyns vörum og fá þannig skemmtilegri útkomur en ef aðeins er notuð ein tegund.

Í snyrtiveskinu mínu kennir því nú ýmissa grasa. Hér má sjá það helsta.

Maybelline Brow Drama

MAC Lingering Eye Brows

Maybelline Dream Fresh BB

Loréal Lumi Primer

Þessi primer gefur húðinni mjög fallega áferð en hann hentar síður þeim sem eru með feita húð.

Ég er með feitt T-svæði og finnst hann ýta undir það.

NYX Eye Shadow Base

Make Up Store Glitter Eyeliner

Maybelline Eyestudio

Þessi augnskuggapalletta finnst mér vera algjört möst í snyrtiveskið. Hún er frískleg og litirnir í henni eru ekki of dökkir. Þessa nota ég mikið þegar mig vantar eitthvað smá extra en vil ekki vera of fín.

Loréal Lumi Highlighter Pen

MAC Face and Body Foundation 

Þessi farði finnst mér vera einn sá besti sem völ er á. Hann er mjög léttur og felur til dæmis ekki freknurnar sem mér finnst mjög stór kostur.

Smashbox Photo Finish Primer

Body Shop Bronzing Powder

Gosh Catchy Eyes

MAC Powder Blush

Loréal Super Liner

Þessi eyeliner er frábær til þess að gera þunnar og fallegar línur.

Make Up Store Cover All Mix

Ég er enn að reyna að gera það upp við sjálfa mér hvort þessi vara sé eitthvað fyrir mig. Ég sé ekki þetta frábæra við hana sem allir virðast vera að tala um en ætla að gefa henni aðeins lengri séns.

MAC Mineralize Skinfinish Natural

Mér finnst mjög gaman að dunda mér við allskyns förðun þegar ég hef góðan tíma í það. Að mála sig þegar ég er ný stigin uppúr rúminu er því ekkert fyrir mig. Ég er því einstaklega heppin að vera í vinnu þar sem það er mér nánast til meiri trafala að mæta máluð en ekki.

Ég á það þó til á frídögum að skella á mig andlitinu, allavega svona annað slagið. Hér fáið þið því smá sýnishorn af förðun með mínum uppáhalds snyrtivörum.

Vörur: Mac Face and Body Foundation// MAC Mineralize Skinfinish Natural// Body Shop Bronzing Powder// MAC Powder Blush// Maybelline Eyestudio// Loréal Super Liner// Gosh Catchy Eyes// Maybelline Brow Drama

Á vörunum er ég svo vanalega bara með Blistex varasalva. Ég hef reynt án árangurs í mörg ár að nota hverskyns varaliti en efri vörin á það alltaf til að hverfa þegar ég tek upp á því. Það eru því aðeins tveir kostir í stöðunni; Hætta með öllu að nota varaliti eða fá sér botox. Ég hef ekki enn gert upp hug minn.

Áthátíð

Páskarnir ættu nú seint að hafa farið framhjá nokkrum manni enda eru íslendingar æstir í það að birta myndir af bæði páskaeggjum og málsháttum. Ég er nú ekki kristinnar trúar en er þó mikið fegin þessum dögum. Páskarnir gefa manni nefninlega afsökun til þess að troða vel í sig, sem mér þykir nú aldrei leiðinlegt. Svo ekki sé minnst á launin sem maður fær fyrir að vinna á rauðu dögunum. 

Nammi í morgunmat. Það segir nú ekki margur nei við því. Ég var þó fljót að gefa þennan súkkulaðibolta frá mér, enda aldrei verið mikið fyrir súkkulaði.

Í seinni tíð hefur mér tekist ágætlega að sætta mig við það að ég verð sennilega aldrei grannvaxin. Til þess þykur mér matur of góður. Ég hef milljón og einu sinni reynt að fara í eitthvað sem kallast megrun eða lífstílsbreyting. Það endist oftast í svona viku. Þá gefst ég upp og kaupi mér kók.

Ég hef til dæmis oftar en einu sinni reynt að gefa mig alla í Herbalife lífstílinn. Eytt fúlgu fjár í duft og pillur og fékk í staðin loforð um flottasta líkamann i bænum. Hversu lengi entist það? Í þrjá daga. Eftir þrjá daga á þessum kúr var ég orðin svo pirruð og rugluð á því að hugsa útí allt það sem ég lét ofan í mig að ég gafst upp og keypti mér langþráð sushi. Já eftir 3 daga á duftkúr er sushi langþráð. 

Mér er einnig sérlega minnistætt þegar ég ætlaði í eitthvert skiptið að taka mig rækilega í gegn og missa nokkra tugi kílóa. Nennti ég að fara í ræktina og hreyfa mig? Nei. Í staðin fannst mér það hreint út sagt frábær hugmynd að fara bara á súpukúr. Já ég skyldi sko borða súpu í hvert einasta mál því að sjálfsögðu fyrirfinnast hvorki kolvetni né fita í fljótandi fæði. Mig minnir að ég hafi fengið mér súpu í hádeginu einn daginn og síðan ekki söguna meir. Það er þó vert að taka það fram að ég var mun yngri og vitlausari en nú þegar ég fékk þessa ágætu flugu í hausinn.

Mér finnst því einstaklega illa gert gagnvart okkur átelskendum að halda fitness mót um miðja páska. Keppendur gætu þá allavega sýnt okkur þá kurteisi að birta engar bikinimyndir af sér fyrr en eftir að þjóðin er búin að éta sig pakksadda af súkkulaði og mat. 

Ég læt þetta þó ekki stoppa mig og ætla að taka góðan lúr fyrir páskalambið.

Ég keppi bara í fitness á næsta ári.

NaglaLÖKK til sölu

Don´t Violet Me Down by Opi// Metallic White by Kleancolor// Superpower Blue by Maybelline// Top Coat Confetti by Loréal// Gasoline by Gosh// Silent Stars Go By by Opi// Salsa by Kleancolor

Já kæru lesendur, nú hef ég endanlega gengið af göflunum. 

Vegna plássleysis hef ég ákveðið að selja nokkur af naglalökkunum mínum á skít og kanil ef áhugi er fyrir hendi. Flest þessara lakka hafa einungis verið brúkuð einu sinni og eiga því vel skilið að eignast nýtt heimili. 

Engar áhyggjur þó, ég nældi mér í tvö ný naglalökk í dag svo ég er nú ekki að verða uppiskroppa. 

Endilega hafið samband ef þið hafið áhuga, þessar elskur fara allar á sanngjörnu verði.

Vor&sumar neglur 2014

Fyrir nokkru síðan ákvað ég að fara í enn eina naglalakksafvötnunina. Mér fannst ég þvílíka hetjan þegar ég labbaði framhjá naglalökkum á 20% afslætti án þess að kaupa svo mikið sem eitt. Ég gekk meira að segja svo langt að gefa systrum mínum heil 10 stykki af naglalökkum úr einkasafni mínu. Mikið sem ég var stolt af sjálfri mér.

Svo kom Brazil by OPI í verslanir. Ég vissi að ég hreinlega yrði að eignast Liquid Sand lökkin og það  ekki seinna en núna. Ég greip því tækifærið þegar við mamma vorum staddar í Smáralind um daginn. Síminn hennar hringdi og ég áttaði mig strax á því að símtalið myndi taka góðan tíma. Ég sá mér því leik á borði og hentist á ljóshraða inn í Lyfju og greip með mér kassann góða. Þetta hafðist næstum því. Mamma greip mig glóðvolga þar sem ég stóð í röðinni við kassann og var að rétta út kortið. 

En út gekk ég með lökkin þó ég hefði kosið að komast upp með þetta óséð.

Ekki gat ég svo sleppt því að kaupa hinn mini pakkann frá OPI. Þetta er sett. Það er nánast bara skylda að eiga þau öll. 

Ég sé svo sannarlega ekki eftir kaupunum enda eru lökkin hver öðru fallegri. Bjartir litil og pastel tónar virðast ætla að tröllríða öllu í naglatísku sumarsins og það er ég mjög ánægð með. OPI hitti svo sannarlega í mark með sumarlínu sinni í ár og ég er nokkuð viss um að ég verði að fjárfesta í stærri týpurnar af mínum uppáhaldslökkum svo ég verði ekki orðin uppiskroppa þegar sumarið lætur loksins sjá sig. 

Af þeim 8 lökkum sem ég á eru þessi 3 í mestu eftirlæti: Kiss Me I´m Brazilian - Where Did Suzi´s Man-go - You´re So Flippy Floppy.

Fullkomnir sumarlitir.

Önnur snyrtivörumerki virðast vera á sömu hillu og ég býð spennt eftir því að geta fjárfest í fleiri fallegum sumarlitum. 

Hár&fár

Ég hef alla mína tíð verið með frekar sítt hár. Samhliða því hefur fylgt mér mikill ótti við það að klippa á mér hárið, það þarf ekki nema að nefna klippingu og ég er farin að tárast. Ég er nefninlega haldin þeirri kenningu að ég sé ekki með höfuðlagið í það að vera stuttklippt og væri því ekkert annað en ljót með hár sem nær ekki langleiðina niður á rass.

Mér er sérlega minnistætt þegar ég lét eitt sinn klippa 15 cm af hárinu. Ég grenjaði eins og stunginn grís. Mamma hló og ég neitaði að tala við hana í dágóðan tíma. 

Ástandið á heimilinu var því rafmagnað þegar ég tilkynnti henni í gær að ég væri á leið í klippingu. 

Það var þó ekki tekið út með sældinni að vera með allt þetta hár. Það gerðist reglulega að ég lokaði bílhurðinni á hárið á mér, sem er ekki gott fyrir hársára. Einnig eyddi ég löngum tíma í það að toga hárið útúr ermunum eftir að ég var búin að klæða mig í peysu eða jakka. Ég tala nú ekki um hættuna sem fylgir því að fara út úr húsi með allt þetta hár í miklum vindi og sjá ekki útúr augunum. 

Það þarf svo varla að minnast á þann viðbjóð þegar hárið festist undir handakrikanum. Ég geri allavega sterklega ráð fyrir því að ég sé ekki sú eina sem glímt hefur við slæma fylgifiska síða hársins. 

Þetta gerðist svo í morgun þegar ég greiddi í gegnum ljónahárið. Burstinn þoldi augljóslega ekki álagið lengur. Ég tók þessu sem örlögin væru að segja mér eitthvað enda átti ég pantaðan tíma í klippingu klukkustund síðar. 

Af fóru heilir 20 cm og ég hef sjaldan verið jafn ánægð. Allavega enn um sinn. Ég leyfi ykkur að fylgjast með hvort handakrika vandamálið verði enn til staðar eftir breytinguna.

Góða helgi!

Föndurkvöld

Okkur systrum var boðið á föndurkvöld í gærkvöldi þar sem við lærðum að búa til fallegar seríur.

Við erum reyndar hvorugar þekktar fyrir það að vera sérlega handlagnar systur. Mér er enn minnistætt þegar ég var látin vinna sama handavinnuverkefni og krakkar í 4. bekk þegar ég var komin á efsta stig í grunnskóla. 

Seríugerðin er hinsvegar fremur einföld og ætti að vera á allra færi að framkvæma. Við vorum að sjálfsögðu líka með frábæran kennara sem sýndi okkur réttu handtökin.

Nývafðir hnyklar tilbúnir í verkið.

Erfiðasta verkið var án alls vafa að blása upp vatnsblöðrurnar sem nota þurfti í föndrið. 10 stykki á mann voru það. Smá pása er nauðsynleg eftir svoleiðis átök, enda flestir orðnir fremur loftlausir. 

Frekar mikill subbuskapur fylgir þessu ágæta föndri svo við færðum okkur inn í bílskúr til þess að leggja lokahönd á seríurnar.

Svo þarf að bíða í sólarhring meðan límið þornar svo hægt sé að sprengja blöðrurnar og troða seríu inn í kúlurnar.

Svona koma seríurnar svo til með að líta út þegar þær eru tilbúnar. Ég er ótrúlega spennt að fá föndrið í hendurnar svo ég geti fundið góðan stað fyrir seríuna mína. Auðvelt og skemmtilegt föndur sem kemur ótrúlega fallega út.

Nýjung í snyrtiveskinu

Í gær eignaðist ég nýjan eyeliner sem ég var lengi búin að dást að úr fjarlægð. Ég þoldi svo ekki við lengur í gærmorgun og gerði mér sérferð í Smáralind til þess að festa kaup á þessari nauðsyn. Eyelinerinn er til í nokkrum litum fallegum litum, minn ber nafnið Choco Lux.

Ég er bæði búin að prufa eyelinerinn einan og sér og með svörtum, blautum eyeliner eins og sést hér á myndinni. Liturinn finnst mér alveg fullkominn og hann hentar mér og mínum augum mjög vel. Hann verður sko klárlega mikið notaður.

Meðleigjandinn kom að mér þar sem ég var niðursokkin í sjálfsmyndatöku inni í stofu. Það var bæði vandræðalegt og nauðsynlegt augnablik í okkar sambúð. Mér finnst ég loksins geta verið ég sjálf. 

Það er nú bara ekki annað hægt en að smella einni, eða tuttugu myndum, af sér þegar maður prufar nýja snyrtivöru.

Nauðsyn í fataskápinn

Þessa flík þarf ég að eignast. Núna.

Lunch beat UN Women

Föstudaginn 14. febrúar næstkomandi stendur UN Women í samstarfi við Lunch Beat og Sónar fyrir Milljarður Rís. Markmiðið er að fá 3000 manns um allt land til þess að dansa í klukkutíma fyrir mannréttindum kvenna. Frítt verður inn á viðburðinn sem hefst klukkan 12 á hádegi í Hörpunni.

Mér finnst þetta frábær og skemmtilegur viðburður og ekki skemmir fyrir að hann er fyrir góðan málstað sem nauðsynlegt er að vekja athygli á. 

Ég ætla allavega að mæta í Hörpuna og dansa mig inn í helgina, hvar verður þú?

Yfir 600 milljónir kvenna búa í löndum þar sem heimilisofbeldi er ekki refsivert.

Helsta dánarorsök evrópskra kvenna á aldrinum 16-44 ára er heimilisofbeldi.

Konum er nauðgað á 26 sekúndna fresti í Suður Afríku.

Í Brasilíu deyja 10 konur á hverjum degi, eingöngu vegna heimilisofbeldis.

Menn ættu nú ekki að þurfa að hugsa sig tvisvar um eftir að hafa lesið þessa punkta. Mætum, styðjum gott málefni og skemmtum okkur hrikalega vel.

Sjáumst í Hörpu!

HÉR má finna nánari upplýsingar um viðburðinn fyrir áhugasama.

Þátta árátta

Ég er ein af þeim sem hefur einstaklega gaman af því að horfa á hina ýmsu þætti. Einstaka sinnum læðist ein og ein kvikmynd inn á milli en oftast eru það þættirnir sem eiga hug minn allan. Kannski meira en góðu hófi gegnir. Ég veit ekki hvort ég er sú eina en ég eyði sífellt meiri tíma í það að leita mér  að spennandi þáttum til að bæta við þó þéttskipaða dagskránna.

Þið megið endilega benda mér á þætti sem koma út á auðu dögunum. Það má alltaf á sig blómum bæta.

Ég hef þó tamið með mér þann ósið að ég horfi sjaldnast á þættina þó þeir séu í gangi í tölvunni. Ég er orðin nokkuð sannfærð um að ég sé haldin athyglisbrest af einhverju tagi þar sem ég get aldrei horft á þátt án þess að hafa eitthvað annað fyrir stafni á meðan. Oftar en ekki naglalakka ég mig. Stundum leysi ég Sudoku þrautir eins og ég fái borgað fyrir það. Ætli næsta mál á dagskrá sé ekki að læra að prjóna. Hverskonar sauma og prjónaskapur hefur þó alltaf vafist fyrir mér en ég hlýt að geta googlað þetta.

Jújú, ég á það þó til að líta upp á tölvuskjáinn til þess að sjá hvað er að gerast. Svona á milli þess sem ég brýt heilann yfir stærðfræðiþrautum. Mínir allra uppáhalds þættir eru án efa Shameless með þeim Emmy Rossum og William H. Macy í aðalhlutverkum. Svartur húmor með dass að drama. Klikkar ekki í mínum bókum. Hver er ykkar uppáhalds þáttur?

Lúxusvandamál !

Ég hef átt bíl, sama bíl síðan að ég fékk bílprófið, eða meira að segja áður en ég fékk bílprófið... því ég þorði ekki að taka það strax ! ... Bílinn hefur oftar en ekki látið á sér standa og ég veit ekki hversu mörgum krónum ég hef eytt í viðgerðir á honum. En þó svo að ég bölvi því í hvert skipti sem eitthvað sé að þá get ég ekki án hans verið !

Í gær tók bíllinn minn uppá því að bila, bara sí svona .. nú situr hann í bílastæðinu og á sér enga von, og það sama má segja um mig... ég er gjörsamlega lömuð án hans. Þetta er alveg ótrúlegt lúxusvandamál og setur helgarplönin alveg úr skorðum, að komast á milli staða breyttist á svipstundu í að vera ósköp einfaldur hlutur í einn agalega flókinn (hver ætli geti skutlað mér...ætti ég að læra á strætó...ætli ég geti fengið far hjá þessum.... hvað kostar að taka taxa...á einhver hjól til að lána mér....nei ekki í kjól á hjól....osfrv) 

Það sem ég er búin að mikla þetta bílaleysi fyrir mér og vorkenna mér agalega að vera án hans. Málið er að ég er alltof góðu vön, ég meina ég hef lappir og "the ability to walk", það er strætóskýli rétt hjá heimilinu mínu, ég á hlý föt til útiveru, ég á klink í strætó, ég bý á Íslandi en ekki á Indlandi og get þess vegna verið nokkuð viss um að lifa af strætóferð .... það er í raun ekkert sem stendur í vegi fyrir mér... 

...en gvuð hvað ég hlakka samt til að fá bílinn minn aftur :) 

-gm

 

Föstudagsmyndir

Jæja nú verð ég að fara gefa mér meiri tíma í að henda inn einhverju skemmtilegu hér á síðuna, í þetta sinn ætla ég þó einungis að birta nokkrar myndir , vona að það falli í kramið á þessum fallega föstudegi.

Við systur kampakátar á áramótunum

Þetta matreiddi ég á bóndadaginn handa ástmanninum, já ég veit þetta lítur ekkert mjög girnilega út , en ég reyndi þó ! PS: mamma bakaði samt pizzusnúðana

Ég fór á elsku Reyðarfjörð og fékk sting í magan af söknuði, það er held ég skylda að taka eina mynd af Hádegisfjallinu þegar maður fer austur.

Okei , ég fór í bjórskólann ! ALGJÖR snilld, mæli svo sannarlega með þessu, líka fyrir stelpur, ekki bara miðaldra karlmenn, en meginþorri bekkjarins flokkaðist þar undir.

Við skelltum okkur eins og vanalega á Útsvarið, en gerum það eflaust ekki aftur á næstunni

Spilakvöld með ljúflingum

Afi gamli er bara svo flotturáþví

Bjórskólinn ... 

Hitti litla vinkonu mína í fyrsta skipti fyrir austan, þvílíka gullið

Síðast en ekki síst, sjálfpósumynd af mér með NÝJU gleraugun mín , já er svo hamingjusöm með þau og sé eins og enginn sé morgundagurinn. Mikil smekkmanneskja átti þátt í vali mínu á þessum gleraugum :) 

-gm